Lümbörger Heidland - Lüneburger Heideland
Elv un Heid vör Hamborgs Döör - Landkreis Horborg
Rad feuhrn
De saftig gröönen Maschwischen in’n Noorden un de wiede Heidlandschop in’n Süden vun’n Landkreis Horborg laadt jo vun Harten in, bi uns Urlaub to maken.
De groten Radweeg över Land ...
- Hamborg - Bremen
- Elv-Radweg
- Wümme-Radweg
- Hamborg - Hannover - Göttingen
- Groningen - Bremen - Lümborg
... föhrt jo dörch uns Ferienregioon. Ok de 33 annern Touren, de wi utschillert hebbt, laadt dorto in, de Oogen apen to maken. 300 km könnt ji radeln - un jümmers gifft dat wat anners to sehn.
Wannern
In’n Süden vun uns Lümborger Heidland, in de Romantische Heid mit dat Natuurschutzgebiet Lümbörger Heid un den Wilser Barg (169 m), süht dat meist ut as in en Middelgebirge. In’n Noordwesten, in de Noordheid, liggt de Natuurpark Horborger Bargen, un de modern Stadt Bookholt laadt to’n Inkeupen in.
De Winser Elvmasch mit de fründlich Inkoopsstadt Winsen an’e Luh in’e Mitt slütt sik in’n Noordoosten an. All dat laaadt to’n Wannern in.
Rieden
Peer to hebben, se to tüchten, uptotrecken un to rieden - dat hett in uns Lümbörger Heidland en lang Traditschoon. Wat is dat för en Beleevnis, up’n Rügg vun en Peerd dörch de romantisch Landschop to rieden!
Kutschfohrten
Nehmt Se dat wohr, en romantisch Fohrt mit en historisch Postkutsch to maken, un laat Se sik vun de Landschop Lümborger Heid, de so eenzigoortig is, vertövern.
Freetiet
Dat lohnt sik, nich bloots in den Wildpark Swatte Bargen in’n Noorden vun unsen Landkreis Horborg en Utflug to maken. In en wunnerschöön Woold- un Parklandschop gifft dat dor Barg un Daal un See un en Reeg Dieken. Ok wenn de Deerten nich dor weern, wöör de Besöök sik lohnen! In’n Süüden vun unsen Landkreis freit sik de Wildpark Lümbörger Heid up jo’n Besöök.
Kunst, Kultuur un Geschicht
Twüschen Jesborg un Lüll hebbt Johann Michael Bossard un sien Fro Jutta Bossard-Krull sik jüm ehrn Läbensdroom wohrmaakt vun en Stää, wonehm allens, wat mit Kunst tosamenhangt, to en Eenheit tosamenwasst: Architektuur, Bildhaueree, Maleree, Kunsthandwark un Goornanlagen.
Wokeen weten will, woans de Buurn fröher leevt hebbt, findt allens in’t Butenmuseum an’n Kiekebarg (Freilichtmuseum Kiekeberg) in’n Noorden vun unsen Landkreis. In de Buurnhüüs geiht dat to as in ole Tieden - mit Veeh un Buurngoorn.
Landschop
Een vun de schöönsten Deele vun de Lümbörger Heid is in’n Süden vun Hamborg to finnen - twüschen de Noordheid un den Natuurschutzpark an’n Wilser Barg. In August un September, wenn de Heid bleuhen deit, wiest de Natuur, wat mit nix to verglieken is.
Bet in’n Harvst farvt de Heid, de bleuht, allens in’t wiede Rund düsterrosa - as perfekten Kuntrast to de veelen hellen Sandweeg un de düstergreunen Machangelbeum.
In’n Oosten vun de Horborger Bargen ännert sik dat Bild vun de Landschop: de Winser Elvmasch mit de fruchtbor Eer wiest Feller vull Farven un Weidland vull Saft, dörchsett vun Auwoold un Seen. In de Maschdörper mit de staatschen reetdeckten Buurnhüüs, de sik achtern Elvdiek vör dat Hoochwater schuult, feuhlt sik de Ääbeer tohuus.
Wi wünscht jo en schööne Tiet in’t
Lümbörger Heidland!